आवाज लोकशाहीचा…संतोष आरवडे प्रतिनिधी …….
कोंढापुरीतील २४ वर्षीय तरुणाच्या खुनाचा १२ तासांत उलगडा; दोन अल्पवयीन बालके ताब्यात, धारदार शस्त्राने १८ ते २० वार केल्याची प्राथमिक माहिती
शिक्रापूर | दि. २१
शिरूर तालुक्यातील कोंढापुरी येथे तलावाच्या कडेला रक्ताच्या थारोळ्यात आढळलेल्या अनोळखी तरुणाच्या मृतदेहाची ओळख पटताच शिक्रापूर पोलिसांनी तपासाची चक्रे वेगाने फिरवली. सीसीटीव्ही फुटेज, तांत्रिक तपास आणि गोपनीय माहितीच्या आधारे पोलिसांनी अवघ्या १२ तासांत खुनाचा छडा लावत अहिल्यानगर जिल्ह्यातील श्रीरामपूर तालुक्यातून एका संशयिताला अटक केली. याप्रकरणी दोन अल्पवयीन बालकांनाही ताब्यात घेण्यात आले आहे. या कारवाईमुळे परिसरात खळबळ उडाली असून खुनामागील नेमके कारण शोधण्याचे आव्हान पोलिसांसमोर आहे.
तलावाच्या कडेला रक्ताच्या थारोळ्यात मृतदेह
बुधवारी (दि. २१) सकाळी सातच्या सुमारास कोंढापुरी गावच्या हद्दीत खंडोबा मंदिरासमोरील तलावाच्या कडेला एका अनोळखी व्यक्तीचा मृतदेह पडल्याची माहिती पोलीस निरीक्षक चंद्रशेखर यादव यांना मिळाली. माहिती मिळताच त्यांनी पोलीस अधिकारी आणि कर्मचाऱ्यांसह घटनास्थळी धाव घेतली. शिरूर विभागाचे उपविभागीय पोलीस अधिकारी रवींद्र भोसले यांनीही घटनास्थळी भेट देऊन पाहणी केली.
मृतदेहाची तपासणी केली असता शरीरावर धारदार शस्त्राने वार केल्याच्या अनेक जखमा आढळून आल्या. मृताची ओळख पटविण्यासाठी पोलिसांनी दोन पथके रवाना केली. तपासादरम्यान मृत तरुणाचे नाव महेंद्र लव सकट (वय २४, रा. रांजणगाव गणपती, ता. शिरूर, जि. पुणे) असल्याचे निष्पन्न झाले.
सीसीटीव्ही आणि तांत्रिक तपासातून आरोपींचा माग
या प्रकरणी शिक्रापूर पोलीस ठाण्यात भारतीय न्याय संहितेच्या कलम १०३(१) आणि ३(५) नुसार गुन्हा दाखल करण्यात आला. गुन्ह्याचे गांभीर्य लक्षात घेऊन आरोपींचा शोध घेण्यासाठी पोलिसांनी तीन स्वतंत्र पथके तयार केली.
सीसीटीव्ही फुटेज, तांत्रिक तपास आणि गोपनीय माहितीच्या आधारे पोलिसांनी संशयितांचा माग काढण्यास सुरुवात केली. तपासादरम्यान रांजणगाव गणपती परिसरातील तिघांचा या गुन्ह्यात सहभाग असल्याचा संशय व्यक्त करण्यात आला. संशयित अहिल्यानगर जिल्ह्याच्या दिशेने गेल्याची माहिती मिळाल्यानंतर पोलिसांचे पथक तातडीने रवाना झाले.
तपास पथकाने श्रीरामपूर तालुक्यातील बेलापूर बायपास परिसर गाठला. तेथे तिन्ही संशयित आढळून आले. चौकशीनंतर प्रथमेश नानासाहेब राऊत (रा. फंडवस्ती, रांजणगाव गणपती, ता. शिरूर; मूळ रा. ढोकसांगवी, ता. शिरूर) याला अटक करण्यात आली, तर दोन अल्पवयीन बालकांना पुढील तपासासाठी ताब्यात घेण्यात आले.
वादातून खून झाल्याचा प्राथमिक अंदाज
पोलिसांच्या प्राथमिक तपासानुसार, मृत महेंद्र सकट, संशयित आरोपी आणि अल्पवयीन बालके एकमेकांच्या परिचयातील होती. कोणासोबत फिरायचे आणि कोणाशी बोलायचे, यावरून मृत तरुण आणि अल्पवयीन बालकांमध्ये वाद असल्याची माहिती समोर आली आहे.
याच वादातून महेंद्र याला गांजा पिण्याचे आमिष दाखवून निर्जन ठिकाणी नेण्यात आल्याचा पोलिसांचा प्राथमिक अंदाज आहे. तेथे दोन चाकूंच्या साहाय्याने त्याच्यावर १८ ते २० वार करून खून केल्याची माहिती चौकशीतून समोर आल्याचे पोलिसांनी सांगितले. मात्र, खुनामागील नेमके कारण, प्रत्येक संशयिताची भूमिका आणि घटनाक्रम याबाबत पुढील तपास सुरू आहे.
वरिष्ठांच्या मार्गदर्शनाखाली तपास
पुणे ग्रामीणचे पोलीस अधीक्षक संदिपसिंह गिल्ल, अपर पोलीस अधीक्षक डॉ. शुभम कुमार आणि शिरूर विभागाचे उपविभागीय पोलीस अधिकारी रवींद्र भोसले यांच्या मार्गदर्शनाखाली ही कारवाई करण्यात आली.
पोलीस निरीक्षक चंद्रशेखर यादव यांच्या मार्गदर्शनाखाली सहायक पोलीस निरीक्षक हनमंतराव गिरी, राहुल देशमुख, पोलीस हेडकॉन्स्टेबल नितीन सुद्रिक, राहुल गडदे तसेच पोलीस उपनिरीक्षक उमाकांत कुंजीर, जिनेश कोळी, अंकुश कारंडे, पोलीस हवालदार अमोल दांडगे, रोहिदास पारखे, शिवाजी चितारे, विश्वभर वाघमारे, अमोल चव्हाण आणि पोलीस कॉन्स्टेबल राम जाधव, नारायण वाळके व मच्छिंद निचीत यांनी या कारवाईत सहभाग घेतला.
अनोळखी मृतदेहाची ओळख पटविण्यापासून ते श्रीरामपूरपर्यंत संशयितांचा माग काढण्यापर्यंत पोलिसांनी केलेल्या वेगवान तपासामुळे खुनाचा गुन्हा अल्पावधीत उघडकीस आला आहे. आता या गुन्ह्यातील नेमके कारण आणि सर्व संबंधितांची भूमिका तपासातून स्पष्ट होणार आहे.
