आवाज लोकशाहीचा
विजय चव्हाण
पोलीस ठाण्याच्या परिसरापासून गावोगावी खुलेआम विक्रीचा आरोप; प्रशासनाच्या कारवाईवर गंभीर प्रश्नचिन्ह
यवत : शासनाने गुटख्यावर बंदी घातल्याचे कागदोपत्री चित्र असले, तरी यवत परिसरात मात्र या बंदीला अक्षरशः हरताळ फासला जात असल्याचा गंभीर आरोप पुढे येत आहे. यवतमधील टपऱ्यांपुरता मर्यादित असल्याचे दिसणारा गुटख्याचा व्यवसाय आता दौंड तालुक्यातील गावागावातील पानटपऱ्या, किराणा दुकाने आणि छोट्या विक्री केंद्रांपर्यंत पोहोचल्याची चर्चा आहे.
विशेष म्हणजे, पोलीस ठाण्याच्या परिसरापासून काही अंतरावरच हा व्यवसाय बिनधास्त सुरू असल्याचे आरोप होत असतील, तर प्रशासनाच्या गुटखाबंदीच्या कारवाईवरच मोठे प्रश्नचिन्ह निर्माण होते.
स्थानिक पातळीवर ‘अजित’ आणि ‘सतार’ या नावांची या कथित व्यवसायाशी जोडून चर्चा होत असून, सकाळच्या वेळेत दुचाकीवरून परिसरातील गावांमध्ये गुटखा पोहोचवला जात असल्याचे आरोप केले जात आहेत. या आरोपांची प्रशासनाने स्वतंत्रपणे चौकशी करण्याची गरज आहे.
‘ओलेकरांच्या आशीर्वादाने’ धंदा सुरू असल्याची चर्चा?
गुटख्याचा हा व्यवसाय सुरळीत चालण्यासाठी काहींचे हात ओले केले जात असल्याची स्थानिकांमध्ये चर्चा आहे. ‘ओलेकर’ नावाचा नेमका कोणता प्रशासकीय दुवा या संपूर्ण प्रकरणाला संरक्षण देतोय? हा प्रश्न आता चर्चेच्या केंद्रस्थानी आला आहे. मात्र, या आरोपांची अद्याप अधिकृत पुष्टी झालेली नसून संबंधित प्रशासनाने सत्यता तपासणे आवश्यक आहे.
यवत परिसरातील एका प्रभावशाली ‘कारभाऱ्याचे’ या व्यवसायाला पाठबळ असल्याचीही चर्चा असल्याचे सांगितले जाते. मात्र संबंधित व्यक्तीचे नाव घेण्यास कोणीही तयार नसल्याने या चर्चेतील तथ्य काय, हा स्वतंत्र तपासाचा विषय ठरत आहे.
बंदी कागदावर; विक्री मात्र राजरोस?
गुटख्यावर बंदी असताना तो गावागावात सहज उपलब्ध होत असेल, तर बंदी नेमकी कोणासाठी आणि कारवाई कोणावर? असा संतप्त सवाल नागरिकांकडून उपस्थित होत आहे.
गुटखा विक्री करणाऱ्यांवर कारवाई करण्याची जबाबदारी संबंधित प्रशासनाची असताना, खुलेआम विक्रीचे आरोप होत असतील तर संबंधित यंत्रणांनी केवळ कागदी कारवाई न करता मुळ पुरवठा साखळीपर्यंत पोहोचण्याची गरज आहे.
तरुण पिढीच्या आरोग्याशी खेळ कोण थांबवणार?
गुटखा आणि तंबाखूजन्य पदार्थांच्या सेवनामुळे आरोग्यावर गंभीर परिणाम होऊ शकतात. विशेषतः तरुण पिढीमध्ये या पदार्थांचे व्यसन वाढत असल्याने हा केवळ अवैध विक्रीचा प्रश्न नसून सार्वजनिक आरोग्याचा गंभीर प्रश्न आहे.
गावागावात गुटखा पोहोचत असल्याच्या तक्रारी खऱ्या असतील, तर प्रशासनाने पुरवठादार, वाहतूक करणारे आणि विक्रेते यांच्यावर कठोर कारवाई करणे गरजेचे आहे.
गुटखाबंदी केवळ आदेशात राहणार की प्रत्यक्ष रस्त्यावर उतरणार?
यवतपासून दौंड तालुक्यातील गावागावात पोहोचलेल्या कथित गुटखा साखळीचा सूत्रधार कोण?
आणि प्रशासनाच्या नजरेसमोर हा व्यवसाय सुरू असेल तर जबाबदारी कोणाची?
या प्रश्नांची उत्तरे आता प्रशासनाला द्यावी लागणार आहेत.
‘आवाज लोकशाहीचा’ या प्रकरणातील आरोपांची स्वतंत्रपणे सत्यता पडताळून संबंधित प्रशासनाची भूमिका आणि अधिकृत कारवाई समोर आणण्याचा प्रयत्न करणार आहे.
