आवाज लोकशाहीचा
वरवंड (दौंड):
आदिवासी कोळी महादेव, टोकरे कोळी तसेच इतर अनुसूचित जमातींच्या बांधवांना जात प्रमाणपत्र आणि जात वैधता प्रमाणपत्र मिळण्यात येणाऱ्या अडचणी दूर व्हाव्यात व ही प्रमाणपत्रे सुलभतेने मिळावीत, या प्रमुख मागणीसाठी कोळी महासंघाच्या वतीने आगामी १६ जून २०२६ रोजी राज्यव्यापी एकदिवसीय धरणे आंदोलन करण्यात येणार आहे. राज्यातील सर्व जिल्हाधिकारी कार्यालयांसमोर हे आंदोलन छेडले जाणार असल्याची माहिती कोळी महासंघाचे पुणे जिल्हाध्यक्ष गोविंद गायकवाड यांनी दिली.
शासन दरबारी वर्षानुवर्षे पाठपुरावा, पण निर्णय शून्य!
कोळी महासंघाचे राष्ट्रीय अध्यक्ष तथा माजी आमदार रमेश पाटील यांच्या नेतृत्वाखाली गेल्या अनेक वर्षांपासून हा प्रश्न शासन दरबारी सातत्याने मांडला जात आहे. समाजाच्या वतीने २०१४ पासून आतापर्यंत वेळोवेळी मुख्यमंत्री आणि संबंधित प्रशासकीय विभागांना निवेदने देण्यात आली असून अनेक आंदोलनेही करण्यात आली आहेत. मात्र, अद्यापही जात प्रमाणपत्र व जात वैधता प्रमाणपत्र सुलभतेने मिळण्यासाठी आवश्यक असलेले परिपत्रक काढण्यात आलेले नाही, तसेच कोणताही ठोस निर्णय न झाल्याने कोळी समाजात तीव्र नाराजी पसरली आहे.
प्रशासनाला पूर्वसूचना आणि आंदोलनाची तयारी
शासनाच्या याच उदासीन भूमिकेविरोधात कोळी महासंघाने आता आक्रमक पाऊल उचलले असून, राज्यभरातील सर्व जिल्हाधिकारी कार्यालयांसमोर एकाच दिवशी धरणे आंदोलन करण्याचा निर्णय घेतला आहे. या आंदोलनाची पूर्वसूचना प्रशासनाला आधीच देण्यात आली असून, संबंधित पोलीस ठाणी आणि जिल्हाधिकारी कार्यालयांमध्ये रीतसर अर्ज दाखल करण्यात आले आहेत.
“शासन व प्रशासनाकडून वारंवार दिलेल्या निवेदनांकडे आणि मागण्यांकडे सातत्याने दुर्लक्ष होत असल्यामुळेच आम्हाला १६ जून रोजी या एकदिवसीय धरणे आंदोलनाचा मार्ग अवलंबावा लागत आहे.”
— कोळी महासंघ पदाधिकारी
पुणे जिल्ह्यात आंदोलनाची जय्यत तयारी
या आंदोलनाच्या पूर्वतयारीसाठी आणि ते यशस्वी करण्यासाठी कोळी महासंघाचे पुणे जिल्हाध्यक्ष गोविंद गायकवाड, पुणे जिल्हा संपर्क प्रमुख दत्तात्रय मोतीबणे, पुणे जिल्हा कार्याध्यक्ष शिवाजीराव शिंदे तसेच दौंड तालुका अध्यक्ष शिवाजी शिंदे यांच्यासह अनेक पदाधिकारी व कार्यकर्ते मोठे प्रयत्न करत आहेत.
या आंदोलनात कोळी समाज बांधवांनी मोठ्या संख्येने सहभागी व्हावे, असे आवाहन महासंघाच्या वतीने करण्यात आले आहे.
