“धर्म वेगळे असतील… पण रक्त एकच आहे.

आवाज लोकशाहीचा ……विजय चव्हाण

लोकसंदेश (ईद-ए-मिलाद निमित्त)
प्रश्न खूप मोठा आहे…
आणि उत्तरही तितकंच खोल आहे…
हा देश मुळात मानवतेच्या विचारावर उभा राहिलेला आहे.
पण कालांतराने धर्म, जात, पंथ यांच्या भिंती उभ्या राहिल्या…
इतिहास साक्षी आहे – शोषित, वंचित, दलित यांची वेदना अनेकांनी लिहिली…
कधी ती सत्य होती, तर कधी काहींच्या स्वार्थातून निर्माण झालेल्या कथा…
पण एक गोष्ट मात्र कायम आहे —
निसर्गाला ना जात असते, ना धर्म.
ही माती कोणालाही अन्न देते,
पाणी कोणालाही भेदभाव करत नाही,
हवा श्वास घेताना कधी विचारत नाही —
“तू कोणत्या धर्माचा आहेस?”
मग प्रश्न उभा राहतो —
मानवांमध्येच भेद का?
सण-उत्सव हे आपल्याला जोडण्यासाठी आहेत, तोडण्यासाठी नाहीत.
आजचा ईद-ए-मिलाद हा फक्त एका धर्माचा सण नसून
मानवतेचा, प्रेमाचा आणि सहिष्णुतेचा संदेश देणारा दिवस आहे.
आपण इतिहासाकडे पाहिलं तर —
छत्रपती शिवाजी महाराजांनी सर्व धर्मांना समान न्याय दिला,
डॉ. बाबासाहेब आंबेडकरांनी संविधानातून समतेचा पाया घातला,
डॉ. ए. पी. जे. अब्दुल कलाम यांनी विज्ञानातून देशाला दिशा दिली,
संत तुकाराम, कबीर, नामदेव, ज्ञानेश्वर यांनी
माणुसकीचं बीज पेरलं… धर्माचं नव्हे, प्रेमाचं!
आजही जेव्हा संकट येतं —
कोरोना असो, स्वाइन फ्लू असो किंवा इतर आपत्ती…
तेव्हा माणूस धर्म विसरतो आणि जगण्यासाठी धडपडतो.
रक्ताची गरज पडली तर —
ते हिंदू, मुस्लिम, ख्रिश्चन असं विचारत नाही…
मग जिवंत असताना आपण भिंती का उभ्या करतो?
खरा प्रश्न धर्माचा नाही…
खरा प्रश्न आहे – मानसिकतेचा.
आज समाजात काही शक्ती
तरुणांच्या मनात विष पेरत आहेत…
जात, धर्म, पंथ यांच्या नावावर विभागणी करत आहेत…
म्हणूनच आजची गरज आहे —
जागरूकतेची
शिक्षणाची
आणि सर्वात महत्त्वाचं — मानवतेची
आई-वडील हे पहिले शिक्षक आहेत…
त्यांनी जर मुलांना माणुसकी शिकवली,
तर समाज आपोआप बदलतो.
साने गुरुजींचे शब्द आजही तितकेच खरे आहेत —
“खरा तो एकच धर्म – जगाला प्रेम अर्पावे.”
आवाज लोकशाहीचा संदेश
या ईद-ए-मिलाद निमित्त
आपण सर्वांनी एकच संकल्प करूया —
आधी माणूस बनूया
एकमेकांचा आदर करूया
भेदभावाला नकार देऊया
आणि मानवतेला सर्वात वर ठेऊया
“धर्म वेगळे असतील… पण रक्त एकच आहे.
माणूसपण जपलं तरच देश महान होईल.”
आवाज लोकशाहीचा वतीने सर्वांना ईद-ए-मिलादच्या हार्दिक शुभेच्छा!